निर्माण व्यवसायीको समस्याहरूबारे संस्कृति मन्त्री किरातीको ध्यानाकर्षण
![](https://nepalbhumi.com/wp-content/uploads/2023/01/328004096_716801720101729_8870976752357312589_n-768x432.jpg)
माघ १५, काठमाडौं
नेपाल निर्माण व्यवसायी महासंघका अध्यक्ष रवि सिंह नेतृत्वको प्रतिनिधिमण्डलले आइतवार संस्कृति, पर्यटन तथा नागरिक उड्डयन मन्त्री सुदन किरातीलाई भेटी निर्माण उद्योगको पछिल्लो समस्या र समाधानका उपायबारे अवगत गराएको छ । मन्त्री किरातीसँगको भेटमा अध्यक्ष सिंहले
निरन्तरको मूल्यवृद्धिका कारण थलिएको निर्माण उद्योगलाई चलायमान बनाउन सार्वजनिक खरिद ऐन तथा नियमावलीमा व्यवस्था भए बमोजिम २० प्रतिशत मोबिलाइजेशन पेश्की व्यवसायीले पाउनु पर्ने बताउनुभयो । व्यवसायीहरूको ठूलो रकम भुक्तानी नहुँदा सप्लाई चेनमै गम्भीर समस्या देखिएको प्रति अध्यक्ष सिंहले मन्त्री किरातीको ध्यानाकर्षण गराउनुभयो । निर्माणाधीन आयोजनाहरू सम्पन्न भएपछि मात्र नयाँ आयोजनाको ठेक्का लगाउन उपयुक्त हुने सुझाव पनि अध्यक्ष सिंहले दिनुभयो ।
जावफमा मन्त्री किरातीले व्यवसायीहरूका समस्याबारे आफूले विगतमा संसद्मै आवाज उठाएको स्मरण गराउँदै ठाउँ विशेषमा आवश्यक्ता भन्दा बढीका परियोजना पुग्दा पनि समस्या आएको बताउनुभयो । महासंघ प्रतिनिधिमण्डलले मन्त्री किरातीको सफल कार्यकालका लागि शुभकामना पनि व्यक्त गरेको छ । महासंघ प्रतिनिधिमण्डलमा महासंघ अध्यक्ष रवि सिंह, सल्लाहकार निकोलस पाण्डे, महासचिव रोशन दाहाल, महासंघ कार्य समिति सदस्य दानबहादुर खड्का र कार्यालय प्रमुख प्रेमसिंह ऐर रहनु भएको थियो ।