४ माघ, काठमाडौं।
काठमाडौं उपत्यकाभित्र निर्माण हुने सडक निर्माण गर्नको लागि सरोकारवाला निकायहरुबीच साझा संयन्त्र बन्ने भएको छ । उपप्रधानमन्त्री एवं भौतिक पूर्वाधार तथा यातायात मन्त्री नारायणकाजी श्रेष्ठ र काठमाडौं उपत्यकास्थित सडक निर्माणसँग सम्बन्धित निकायहरूबीच भएको बैठकले साझा सयन्त्र बनाउने निर्णय गरेको हो । मन्त्रालय, स्थानीय निकाय र अन्य आयोजनाहरूले छुट्टाछुट्टै सडक निर्माण गर्ने गरेको तर, कुनै एक निकायले मात्रै चाहेर सडकको गुणात्मक बिकास हुन नसक्ने अवस्थाबीच साझा संयन्त्र बनाएर अगाडि बढ्ने उद्देश्यले उक्त बैठक आयोजना गरिएको हो।

बैठकमा काठमाडौं महानगरपालिकाका मेयर बालेन्द्र शाह, ललितपुर महानगरपालिकाका मेयर चिरिबाबु महर्जन, मन्त्रालयका सचिव गोपालप्रसाद सिग्देल, सडक बिभागका महानिर्देशक अर्जुनजङ्ग थापा, काठमाडौं उपत्यका बिकास प्राधिकरणकी बिकास आयुक्त जानुका ढकाल, काठमाडौं उपत्यका विकास प्रविधिकरणका नायव विकास आयुक्त नवराज प्याकुरेल, अधिकार सम्पन्न वाग्मती सभ्यता एकीकृत बिकास समितिका अध्यक्ष उद्दवप्रसाद तिमल्सिनासहित सडक निर्माणसँग सम्बन्धित निकाय वा आयोजनाका दुईदर्जन भन्दा बढी प्रतिनिधिहरूको उपस्थिति थियो।

त्यसक्रममा उपप्रधानमन्त्री तथा भौतिक पूर्वाधार तथा यातायात मन्त्री श्रेष्ठले सबै निकायबीच एउटा साझा संयन्त्र बनाएर समन्वयमा नै सडक निर्माण र सुधारको काम हुनुपर्नेमा जोड दिनुभयो। ुआ(आफ्नो काम गरौं तर समन्वयमा। उपप्रधानमन्त्री श्रेष्ठले भन्नुभयो,खाल्डाखुल्डी छ, कुन निकायले बनाएको सडक हो थाहा छैन, सडक नबनाएको आरोप भौतिक पूर्वाधार मन्त्रालयलाई आउँछ।

काठमाडौं महानगरका मेयर शाहले आफुहरु मन्त्रालयसँग समन्वय गरेर काम गर्न तयार रहेको र अबैध घरटहरा हटाउन सरकारको मद्दत चाहिएको बताउनुभयो। त्यस्तै ललितपुर महानगर मेयर महर्जनले सार्वजनिक खरिद ऐन ०६३ लाई संशोधन गरेर नीति नै परिवर्तन गर्नुपर्ने आवश्यकता औंल्याउनुभयो।

आयुक्त ढकाल र अध्यक्ष तिमल्सिनाले पनि साझा संयन्त्र, काममा समन्वय र गुणात्मक बिकासको उपप्रधानमन्त्री श्रेष्ठको अवधारणालाई आत्मसात गरेर अगाडि बढ्नुपर्ने बताउनुभयो। सडक र समस्याको पहिचान गरेर कामलाई गति दिईने र हरेक महिनाको १५ गतेपछिको शुक्रबार दुई बजे यही निकायबीच अन्तरक्रियात्मक बैठक बस्ने सहमति त्यसक्रममा भएको छ।

यसअघि नेपाल विद्युत प्राधिकरण, काठमाडौ उपत्यका खानेपानी लिमिटेड र मेलम्ची खानेपानी आयोजना र सडक बिभागबीच पनि संयुक्त संयन्त्र बनाएर अगाडि बढ्ने निर्णय भैसकेको छ।