नेपालभूमि, काठमाडौं।

शहरी विकास मन्त्री मेटमणि चौधरीले निर्माधीन संघीय संसद् भवन निरीक्षण गर्नुभएको छ । सिंहदरबार परिसरभित्र निर्माण भइरहेको भवनको मंगलबार मन्त्री चौधरीले निरीक्षण गर्नुभएको हो । मन्त्री चौधरीले तोकिएको समयमै निर्माण कार्य सम्पन्न गर्न निर्देशन दिनुभयो । निरीक्षणका क्रममा मन्त्री चौधरीले संसद् भवन निर्माणको कार्य प्रगति विवरणबारे जानकारी लिनुभएको थियो ।

उहाँले भन्नुभयो, ‘संसद् भवन हाल भइरहेको काम सन्तोषजनक देखिन्छ । करिब ९५ प्रतिशत नै काम सकिएको पाइएको छ । यद्यपि यसलाई समयमै निर्माण सम्पन्न गर्न लाग्नुहोस् । नयाँ बन्ने संसद् साँच्चै सुविधायुक्त हुनुपर्छ ।’

उहाँले निर्माणाधीन भवनमामा सांसदहरूका लागि उपलब्ध हुने सुविधा लगायतका बारेमा चासो राख्नुभएको थियो । यस्तै मन्त्रालयका सचिव डा. रमेश प्रसाद सिंहले निर्माण कम्पनीका प्रतिनिधिलाई समयमै काम सक्न निर्देशन दिनुभयो ।

उहाँले विभिन्न बहानामा म्याद थप नगरिनमा जोड दिँदै गुणस्तरीयता सम्झौता गर्न नहुने बताउनुभयो । उहाँले मन्त्रालयका तर्फबाट हुने आवश्यक सबै खालको सहयोग गर्न आफू तत्पर रहेको समेत बताउनुभयो ।

उहाँले भन्नुभयो, ‘बाहिर संसद् भवन कहिलेसम्म बन्छ भन्ने प्रश्न उठिरहेको छ । त्यस कारण पनि संघीय संसद्को निर्माण कार्य समयमै सक्नुपर्छ । मन्त्रालयको तर्फबाट आवश्यक पहल र सहजीकरणको लागि हमेशा तत्पर छु । यो वा त्यो बहानामा म्याद थप्ने काम हुँदैन । भवनको गुणस्तरलाई ध्यानमा राखेर काम गर्नुस् ।’

यस्तै विशेष भवन निर्माण आयोजना समन्वय कार्यालय का प्रमुख दिलीप शेखर श्रेष्ठले निर्माणाधीन संसद् भवनको प्रगति विवरणबारे मन्त्री समझ ब्रिफिङ गर्नुभएको थियो । उहाँले नयाँ बन्ने संसद् भवनका विभिन्न आयामबारे पनि जानकारी दिनुभएको थियो ।